ब्रम्हपुरीचा राजा गणेशोत्सव मंडळातर्फे आयोजन
विधायक दीपस्तंभ वृत्तसेवा
ब्रम्हपुरी (जिल्हा चंद्रपूर):
गोंडवानाच्या स्वातंत्र्यासाठी जिवाचं रान करुन वयाच्या २५ व्या वर्षी शहीद झालेल्या चांदागड च्या सुपुत्राची, आदिवासी गोंडराजाची शौर्यगाथा असलेल्या “गोंडवानाचा महायोध्दा- क्रांतिवीर बाबूराव शेडमाके” या नाटकाचा प्रयोग मौजा – ब्रम्हपुरी (जिल्हा -चंद्रपूर ) येथे दिनांक २१ सप्टेंबर २०२३ ला रात्रो ८.३० वा. विरोधी पक्षनेते विजय वडेट्टीवार यांच्या “ब्रम्हपुरीचा राजा गणेशोत्सव मंडळ” मध्ये संत तुकडोजी महाराज पटांगणात भव्य दिव्य स्वरुपात आयोजन करण्यात आले आहे.
झाडीपट्टीतील नाटककार चुडाराम बल्हारपूरे यांनी या नाटकाचे लेखन केलेले असून, प्रसिद्ध गायक, दिग्दर्शक व निर्माता अनिरुद्ध वनकर यांनी त्यांच्या लोकजागृती संस्था, चंद्रपूर च्या वतीने या नाटकाची निर्मिती केली आहे.
नाट्य प्रयोगात सिनेस्टार मुन्ना बिके, निखिल मानकर, राजरत्न पेटकर, संजीव रामटेके, सुरज चौधरी, गुरू मोहूर्ले, अविनाश कडूकर, अमित दुर्गे, यश शेंडे, वेदांत मेहता, अंकुश शेडमाके, भाष्कर मडावी, शुभम गुरनुले, गणेश मडावी, मयुर मस्के, अनुराग मुळे, स्नेहल वाडगुरे आदी पुरुष कलावंत आणि करिश्मा मेश्राम, रुपाली खोब्रागडे, नयना खोब्रागडे, प्रियंका सिडाम, माधुरी ढोरे, मनिषा बावणे, प्रविण लाडवे, संजना येलेकर, राजश्री, स्मिता, भावना इत्यादी स्त्री कलावंतांसह नॅशनल स्कूल ऑफ ड्रामा, नवी दिल्ली यांचे “नाट्य प्रशिक्षण शाळेत” प्रशिक्षीत ३५ कलावंत भुमिका करीत आहेत. रेला नृत्य, आकर्षक प्रकाशयोजना व पार्श्वसंगीत या नाटकाचे खास आकर्षण असणार आहे.
सदर नाट्य प्रयोग रसिकांच्या आग्रहास्तव प्रबोधन व मनोरंजन याकरिता सादर करण्यात येत आहे.त्यामुळे रसीक प्रेक्षकांनी ऐतिहासिक नाटय प्रयोगाला बहुसंख्येने आवर्जून उपस्थित राहावे असे आवाहन सादरकर्ते व आयोजक मंडळातर्फे करण्यात आले आहे.
